ಹಳೇಕಾಲದ್ದೆಲ್ಲ ಹೊಸರೂಪ ಹೊದ್ದು

ಮಲೆನಾಡಿನ ಸೌಂದರ್ಯ ಎಷ್ಟು ಮನಮೋಹಕವೋ, ಅಲ್ಲಿನ ಆಹಾರ ಸಂಸ್ಕೃತಿಯೂ ಅಷ್ಟೇ ವಿಶಿಷ್ಟ ಮತ್ತು ಆರೋಗ್ಯಪೂರ್ಣ. ಪ್ರಕೃತಿಯೊಂದಿಗೆ ಮೇಳೈಸಿದ ಅಲ್ಲಿನ ಜೀವನಶೈಲಿಯಲ್ಲಿ ಅಡುಗೆಮನೆಯೇ ಮೊದಲ ಆಸ್ಪತ್ರೆ. ಅಲ್ಲಿ ತಯಾರಾಗುವ ಪದಾರ್ಥಗಳೇ ಪರಮ ಔಷಧ. ಈ ಅದ್ಭುತ ಪರಂಪರೆಯ ಅತ್ಯಂತ ಪ್ರಮುಖ, ಸಾಂಪ್ರದಾಯಿಕ ಹಾಗೂ ಹಳೆಯ ರೆಸಿಪಿ ಎಂದರೆ “ತಂಬುಳಿ”

ಮಧ್ಯಾಹ್ನದ ವೇಳೆ ಬಿರುಬಿಸಿಲಿರಲಿ, ಮಳೆಯಿರಲಿ ಅಥವಾ ಚಳಿಯೇ ಇರಲಿ ಮಲೆನಾಡಿನ ಮನೆಗಳು, ಹಳೆಯ ಪುಟ್ಟಪುಟ್ಟ ಸಾಂಪ್ರದಾಯಿಕ ಹೋಟೆಲುಗಳಿಂದ ತಂಬುಳಿಯ ಕಂಪು ಹರಡುತ್ತಿರುತ್ತದೆ. ದೇಹಕ್ಕೂ ಮನಸಿಗೂ ತಂಪು ನೀಡುವ ತಂಬುಳಿ ರುಚಿಯೇ ಅನನ್ಯ.

ಇತ್ತೀಚೆಗೆ ಬೆಂಗಳೂರಿನಲ್ಲಿಯೂ ತಂಬುಳಿ ಅದರಲ್ಲಿಯೂ ವೈವಿಧ್ಯ ತಂಬುಳಿಗಳನ್ನು ತಯಾರಿಸಿ ಮಾರಾಟ ಮಾಡುವ ಮಳಿಗೆಗಳನ್ನು ನೋಡಿದರೆ ಅಚ್ಚರಿಯಾಗುತ್ತದೆ. ಮಳಿಗೆ ಎಂದರೆ ಹಳೇಕಾಲದ ಅಂಗಡಿಗಳ ಚಿತ್ರಣವೇ ನಮ್ಮ ಕಣ್ಮುಂದೆ ಬರುತ್ತದೆ. ಆದರೆ ಇವು ಆಧುನಿಕ ಶೋ ರೂಮ್‌ ರೂಪ ಹೊದ್ದು, ಮಿನುಗುವ ಬಣ್ಣಬಣ್ಣದ ಲೈಟುಗಳ ಬೆಳಕಿನಲ್ಲಿ, ಮಡಿಕೆಗಳಲ್ಲಿ, ಮಿನುಗುವ ಪಾತ್ರೆಗಳಲ್ಲಿ ರುಚಿಕರ ತಂಬುಳಿ ಇಟ್ಟು ಗಾಜಿನ ಬಾಗಿಲುಗಳ ಹಿಂದೆ ಮಾರುತ್ತವೆ. ಈ ಕಲಾತ್ಮಕ ಆಹಾರ ಪದ್ಧತಿಯನ್ನು, ಅದರ ಅಪ್ಪಟ ಮಲೆನಾಡಿನ ಸೊಗಡಿನೊಂದಿಗೆ ಇಂದಿನ ಆಧುನಿಕ ಪೀಳಿಗೆಗೂ ತಂಬುಳಿಯ ಮಹತ್ವವನ್ನು ಪರಿಚಯಿಸುತ್ತಿರುವುದು ಮೆಚ್ಚುಗೆ ಸೂಚಿಸಬೇಕಾದ ಕೆಲಸವೆಂದೇ ನನ್ನ ಅಭಿಪ್ರಾಯ

ತಂಬುಳಿ ಎಂದರೆ ಕೇವಲ ಅಡುಗೆಯಲ್ಲ, ಅದೊಂದು ವಿಜ್ಞಾನ!

‘ತಂಪು’ ಮತ್ತು ‘ಹುಳಿ’ (ಅಥವಾ ಒಗ್ಗರಣೆ/ಮಜ್ಜಿಗೆಯ ಸಮ್ಮಿಲನ) ಎಂಬ ಪದಗಳಿಂದ ಬಂದಿರುವುದೇ ತಂಬುಳಿ. ಇದು ಕೇವಲ ನಾಲಿಗೆಯ ರುಚಿಗಷ್ಟೇ ಅಲ್ಲ, ದೇಹದ ಉಷ್ಣತೆಯನ್ನು ಸಮತೋಲನದಲ್ಲಿಡಲು ಮಲೆನಾಡಿಗರು ಕಂಡುಕೊಂಡ ಅತ್ಯುತ್ತಮ ಸಾತ್ವಿಕ ಆಹಾರ. ತಂಬುಳಿಯನ್ನು ಬಿಸಿ ಬಿಸಿ ಅನ್ನದೊಂದಿಗೆ ಮೊದಲ ತುತ್ತಾಗಿ ಸವಿಯುವುದೇ ಒಂದು ಅನುಭೂತಿ.

ಆಹಾರವೇ ಔಷಧ: ತಂಬುಳಿಯ ವೈವಿಧ್ಯತೆ ಮತ್ತು ಆರೋಗ್ಯ ಗುಣಗಳು

ಮಲೆನಾಡಿನ ಅಮ್ಮಂದಿರ ಕೈಚಳಕದಲ್ಲಿ ಮೂಡಿಬರುತ್ತಿದ್ದ ತಂಬುಳಿಗಳಲ್ಲಿ ನೂರಾರು ವೈವಿಧ್ಯಗಳಿವೆ. ಋತುಮಾನಕ್ಕೆ ತಕ್ಕಂತೆ, ದೇಹದ ಅಗತ್ಯಕ್ಕೆ ತಕ್ಕಂತೆ ಇಲ್ಲಿನ ತಂಬುಳಿಗಳು ಬದಲಾಗುತ್ತವೆ.

 ಬ್ರಾಹ್ಮಿ (ಒಂದೆಲಗ) ತಂಬುಳಿ: ಮಿದುಳಿನ ಕಾರ್ಯಕ್ಷಮತೆ ಮತ್ತು ಜ್ಞಾಪಕ ಶಕ್ತಿಯನ್ನು ಹೆಚ್ಚಿಸಲು ಇದು ರಾಮಬಾಣ. ಮಕ್ಕಳ ಬುದ್ಧಿಶಕ್ತಿ ವಿಕಾಸಕ್ಕೆ ಇದನ್ನು ನಿಯಮಿತವಾಗಿ ನೀಡಲಾಗುತ್ತದೆ.

 ಜೀರಿಗೆ ಮತ್ತು ಮೆಣಸಿನ ತಂಬುಳಿ:  ಜೀರ್ಣಕ್ರಿಯೆ ಮಂದಗತಿಯಲ್ಲಿದ್ದಾಗ ಅಥವಾ ಹೊಟ್ಟೆ ಉಬ್ಬರವಿರುವಾಗ ಈ ತಂಬುಳಿ ತಕ್ಷಣದ ಪರಿಹಾರ ನೀಡುತ್ತದೆ. ಜಠರಾಗ್ನಿಯನ್ನು ಪ್ರದೀಪನಗೊಳಿಸುತ್ತದೆ.

 ದೊಡ್ಡಪತ್ರೆ (ಸಾಂಬಾರಬಳ್ಳಿ) ತಂಬುಳಿ:  ನೆಗಡಿ, ಕೆಮ್ಮು, ಗಂಟಲು ಕೆರೆತ ಅಥವಾ ಕಫದ ಸಮಸ್ಯೆ ಇದ್ದಾಗ ದೊಡ್ಡಪತ್ರೆ ಎಲೆಗಳ ತಂಬುಳಿ ದೇಹಕ್ಕೆ ಹಿತ ನೀಡುತ್ತದೆ. ಇದು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ.

 ಕೊತ್ತಂಬರಿ ಬೀಜ/ಸೊಪ್ಪಿನ ತಂಬುಳಿ:  ದೇಹದಲ್ಲಿ ಅತಿಯಾದ ಉಷ್ಣತೆ (ಹೀಟ್) ಆದಾಗ, ಕಣ್ಣುರಿ ಉಂಟಾದಾಗ ದೇಹವನ್ನು ತಂಪಾಗಿಸಲು ಇದನ್ನು ಬಳಸಲಾಗುತ್ತದೆ.

 ಲೆಮನ್ ಗ್ರಾಸ್ (ಶುಂಠಿ ಕಡ್ಡಿ) ತಂಬುಳಿ:  ಇತ್ತೀಚಿನ ದಿನಗಳಲ್ಲಿ ಜನಪ್ರಿಯವಾಗುತ್ತಿರುವ ಇದು, ತನ್ನ ವಿಶಿಷ್ಟ ಸುಗಂಧದೊಂದಿಗೆ ದೇಹದ ನರಗಳಿಗೆ ವಿಶ್ರಾಂತಿ ನೀಡಿ, ರೋಗನಿರೋಧಕ ಶಕ್ತಿ ಹೆಚ್ಚಿಸಲು ನೆರವಾಗುತ್ತದೆ.

ಶುಚಿರುಚಿ ಅಷ್ಟೇ ಅಲ್ಲದೇ ಯಾವುದೇ ಹಾನಿಕಾರಕ ರಾಸಾಯನಿಕ, ರುಚಿ ಹೆಚ್ಚಿಸುವ ಟೇಸ್ಟಿಂಗ್‌ ಪೌಡರ್‌ ಬಳಸದೇ ತಂಬುಳಿ ಮಾಡಲಾಗುತ್ತಿದೆ ಎನ್ನುವುದು ಇಂದಿನ ವಿದ್ಯಮಾನದ ದಿನಗಳಲ್ಲಿ ಖಂಡಿತ ವಿಶೇಷ

ಇವೆಲ್ಲದರ ಜೊತೆಗೆ ತಂಬುಳಿ ಮಾರುತ್ತಿರುವ ಅಧುನಿಕ ಮಳಿಗೆಗಳು ವಿದ್ಯಾವಂತ ನಿರುದ್ಯೋಗಿಗಳಿಗೆ ಉದ್ಯೋಗಗಳನ್ನು ಕೊಟ್ಟಿದೆ. ಮಹಾನಗರಗಳಲ್ಲಿ ಪ್ರಮುಖ ಬಡಾವಣೆಗಳ ಮುಖ್ಯರಸ್ತೆಗಳಲ್ಲಿ ಸರಣಿ ಮಳಿಗೆಗಳನ್ನೂ ನಡೆಸುತ್ತಿರುವವರೂ ಇದ್ದಾರೆ.

ಇಂತಹ ಹೆರಿಟೇಜ್ ಆಹಾರವನ್ನು ರುಚಿಯಾಗಿ ತಯಾರಿಸಿ ಶುಚಿಯಾಗಿ ಮಾರಾಟ ಮಾಡುತ್ತಿರುವವರನ್ನು  ಪ್ರೋತ್ಸಾಹಿಸುವುದು ಇಂದಿನ ಒತ್ತಡದ ಬದುಕಿಗೆ ಅಗತ್ಯವಾಗಿದೆ. ನೀವು ಹಾದು ಹೋಗುವ ರಸ್ತೆಗಳಲ್ಲಿ ತಂಬುಳಿ ಮಳಿಗೆ ಕಂಡರೆ ನಿಮಗಿಷ್ಟದ ತಂಬುಳಿ ಸವಿಯಲು ಮರೆಯಬೇಡಿ