ವಿಶ್ವ ಭೂಮಿ ದಿನದಂದು ಭೂಮಿಯ ಆರೋಗ್ಯದತ್ತ ಗಮನ ಹರಿಸೋಣವೇ ?

ಏಪ್ರಿಲ್ 22, 2025. ವಿಶ್ವ ಭೂಮಿ ದಿನ. ಇಂದಾದರೂ ಕೊಂಚ ಪುರುಸೊತ್ತು ಮಾಡಿಕೊಂಡು ಭೂಮಿಯ ಸ್ಥಿತಿಯ ಮೌಲ್ಯಮಾಪನ ಮತ್ತು ಜಾಗತಿಕ ತಾಪಮಾನದ ಪರಿಣಾಮಗಳ ಬಗ್ಗೆ ಗಮನ ಹರಿಸೋಣವೇ ?

ಭೂಮಿ ಎನ್ನುವುದು ಒಂದು ಘಟಕ. ಇದರೊಳಗೆ ಹಲವು ಭೂ ಖಂಡಗಳಿವೆ. ಆದರೆ ಇವೆಲ್ಲವೂ ಒಂದೇ ಘಟಕದೊಂದಿಗೆ ಪರಸ್ಪರ ಸಾವಯವ ಸಂಬಂಧ ಹೊಂದಿವೆ. ಭೂಮಿಯ ಒಂದು ತುದಿಯಲ್ಲಿ ಆಗುವ ನಕಾರಾತ್ಮಕ ಬೆಳವಣಿಗೆ ಮತ್ತೊಂದು ತುದಿಯ ಮೇಲೂ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಭೂಮಿಯ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುವಂತೆ ಮಾಡುತ್ತಿರುವ ಏಕೈಕ ಜೀವ ಪ್ರಬೇಧ ಮಾನವರು. ಇವರಿಂದ ಕಳೆದ 200 ವರ್ಷಗಳಲ್ಲಿ ಆಗಿರುವ ಸಂಗತಿಗಳಲ್ಲಿ ಒಳ್ಳೆಯದಕ್ಕಿಂತ ಕೆಟ್ಟದ್ದೇ ಹೆಚ್ಚು. ಇದಕ್ಕೆ ಹಲವು ಕಾರಣಗಳಿವೆ. ಅವುಗಳನ್ನು ಮುಂದೆ ಚರ್ಚಿಸೋಣ. ಈಗ ಭೂಮಿಯ ವಿಷಯದಲ್ಲಿ ಆಗಿರುವ ಒಳಿತು – ಕೆಡಕುಗಳ ಮೌಲ್ಯಮಾಪನ ಮಾಡೋಣ

ಭೂಮಿಯ ಸ್ಥಿತಿಯಲ್ಲಿ ಆಗಿರುವ – ಆಗುತ್ತಿರುವ ನಕಾರಾತ್ಮಕ ಅಂಶಗಳು

ಹೆಚ್ಚುತ್ತಿರುವ ಮಾಲಿನ್ಯ  ಹೊರಸೂಸುವಿಕೆ

2024ರಲ್ಲಿ ಜಾಗತಿಕ CO₂ ಹೊರಸೂಸುವಿಕೆ ಪ್ರಮಾಣ ಸುಮಾರು 36.8 ಬಿಲಿಯನ್ ಟನ್‌ಗೆ ತಲುಪಿದೆ, ಏಷಿಯಾದಲ್ಲಿ ಕಲ್ಲಿದ್ದಲು ಬಳಕೆ ಮತ್ತು ವಿಮಾನಯಾನ ಬೆಳವಣಿಗೆಯಿಂದ ಮಾಲಿನ್ಯ ಪ್ರಮಾಣ  ವಾರ್ಷಿಕವಾಗಿ ಶೇಕಡ 1.1ರಷ್ಟು  ಹೆಚ್ಚಾಗಿದೆ. ವಾತಾವರಣದ CO₂ ಮಟ್ಟವು  420 ppm ಆಗಿದೆ.

ಜೈವಿಕ ವೈವಿಧ್ಯತೆಯ ನಷ್ಟ

ಡಬ್ಲ್ಯು ಡಬ್ಲ್ಯು ಎಫ್ (WWF) 2024 ರ ಲಿವಿಂಗ್ ಪ್ಲಾನೆಟ್ ವರದಿಯು 1970 ರಿಂದ ವನ್ಯಜೀವಿಗಳ ಸಂಖ್ಯೆಯು ಶೇಕಡ  69 ರಷ್ಟು ಕಡಿಮೆಯಾಗಿದೆ ಎಂದು ತಿಳಿಸಿದೆ. ಇದು ತೀವ್ರ ಆತಂಕಕಾರಿ ಸಂಗತಿ.  1 ಮಿಲಿಯನ್ ಜಾತಿಗಳು ಅಳಿವಿನಂಚಿನಲ್ಲಿವೆ. ಇದಕ್ಕೆಲ್ಲ ಅರಣ್ಯನಾಶವೇ ಕಾರಣವಾಗಿದೆ. . ಉದಾಹರಣೆಗೆ ಹೇಳುವುದಾದರೆ 2000 ರಿಂದ ಅಮೆಜಾನ್‌ ಕಾಡಿನ ಶೇಕಡ  11ರಷ್ಟು  ನಷ್ಟ ಉಂಟಾಗಿರುವುದು. ಇದರ ಜೊತೆಗೆ ಮೀತಿ ಮೀರಿದ ಮೀನುಗಾರಿಕೆಯೂ  ಕಾರಣವಾಗಿದೆ.

ತೀವ್ರ ಹವಾಮಾನ

2024 ರಲ್ಲಿ ದಾಖಲೆಯ ಶಾಖದ ಅಲೆಗಳು ಉಂಟಾಗಿವೆ.  ಪ್ರವಾಹಗಳು ಮತ್ತು ಕಾಡ್ಗಿಚ್ಚುಗಳು ಉಂಟಾಗಿವೆ. ಜಾಗತಿಕ ಸರಾಸರಿ ತಾಪಮಾನವು ಕೈಗಾರಿಕಾ ಪೂರ್ವ ಮಟ್ಟಕ್ಕಿಂತ  1.2°C  ಪ್ರಮಾಣದಲ್ಲಿ ಹೆಚ್ಚಾಗಿದೆ. ಹವಾಮಾನ ಸಂಬಂಧಿತ ವಿಪತ್ತುಗಳಿಂದ ಆರ್ಥಿಕ ನಷ್ಟವು 2024 ರಲ್ಲಿ 200 ಬಿಲಿಯನ್ ಡಾಲರ್ ಗಿತಲೂ ಹೆಚ್ಚಾಗಿದೆ.

ಸಮುದ್ರದ ಮೇಲಿನ ಪರಿಣಾಮ

ಸಮುದ್ರಗಳು ಜಾಗತಿಕ ತಾಪಮಾನದ ಶೇಕಡ  90 ರಷ್ಟು  ಹೆಚ್ಚುವರಿ ಶಾಖವನ್ನು ಹೀರಿಕೊಂಡಿವೆ, ಇದರಿಂದ ಹವಳದ ಬಿಳಿಮಾಡುವಿಕೆ ಉಂಟಾಗುತ್ತಿದೆ. ಇದಕ್ಕೆ 1950 ರಿಂದ ಶೇಕಡ  50ರಷ್ಟು  ಹವಳದ ರೀಫ್‌ಗಳು ಕಳೆದುಹೋಗಿರುವುದು ಪ್ರಮುಖ ಉದಾಹರಣೆ.  ಪ್ಲಾಸ್ಟಿಕ್ ಮಾಲಿನ್ಯವು ಶೇಕಡ  80 ರಷ್ಟು ಸಮುದ್ರ ಜೀವಿಗಳ  ಮೇಲೆ ಪರಿಣಾಮ ಬೀರುತ್ತದೆ, ವಾರ್ಷಿಕವಾಗಿ 8 ಮಿಲಿಯನ್ ಟನ್ ಪ್ಲಾಸ್ಟಿಕ್ ಕಸ ಸಮುದ್ರಕ್ಕೆ ಸೇರುತ್ತಿದೆ..

ಅಮಾಯಕ ರಾಷ್ಟ್ರಗಳ ಮೇಲೆ ಅಸಮಾನ ಪರಿಣಾಮಗಳು

ಮಾಲಿನ್ಯದ ಕಡಿಮೆ ಹೊರಸೂಸುವಿಕೆಗೆ ಕೊಡುಗೆ ನೀಡುವ ಅಭಿವೃದ್ಧಿಶೀಲ ರಾಷ್ಟ್ರಗಳು ಅಸಮಾನವಾದ ಹವಾಮಾನ ಪರಿಣಾಮಗಳನ್ನು ಎದುರಿಸುತ್ತಿವೆ ಉದಾಹರಣೆಗೆ ಸಹಾರಾ ಆಫ್ರಿಕಾದಲ್ಲಿ ಬರ, ದಕ್ಷಿಣ ಏಷಿಯಾದಲ್ಲಿ ಚಂಡಮಾರುತ ಉಂಟಾಗುತ್ತಿರುವುದು. ಇದರ ನಡುವೆ ಶ್ರೀಮಂತ ರಾಷ್ಟ್ರಗಳಿಂದ ವಾರ್ಷಿಕ 100 ಬಿಲಿಯನ್ ಡಾಲರ್  ಹವಾಮಾನ ಹಣಕಾಸು ನೆರವು ನೀಡುವ  ಭರವಸೆಯು ಭರವಸೆಯಾಗಿಯೇ ಉಳಿಯುತ್ತಿದೆ.

ಜಾಗತಿಕ ತಾಪಮಾನದ ಪರಿಣಾಮಗಳು

ಗ್ರೀನ್‌ಹೌಸ್ ಗ್ಯಾಸ್ ಹೊರಸೂಸುವಿಕೆಯಿಂದ ಚಾಲಿತವಾದ ಜಾಗತಿಕ ತಾಪಮಾನವು ಭೂಮಿಯ ವ್ಯವಸ್ಥೆಗಳನ್ನು ಮರುರೂಪಿಸುತ್ತಿದೆ. ಇತ್ತೀಚಿನ ಅಂಕಿಅಂಶದ  ಆಧಾರದ ಮೇಲೆ ಪಟ್ಟಿ ಮಾಡಿರುವ  ಪ್ರಮುಖ ಪರಿಣಾಮಗಳು ಮುಂದಿವೆ.

ಜಾಗತಿಕ ತಾಪಮಾನದಲ್ಲಿ ತೀವ್ರ  ಏರಿಕೆ

1850 ರಿಂದ ಜಾಗತಿಕ ತಾಪಮಾನವು 1.2°C ಏರಿಕೆಯಾಗಿದೆ. 2023 ಮತ್ತು 2024 ಅತ್ಯಂತ ತೀವ್ರ ತಾಪಮಾನದ ವರ್ಷಗಳಾಗಿವೆ. 2050 ರ ವೇಳೆಗೆ 2°C ಏರಿಕೆಯು ದಕ್ಷಿಣ ಏಷಿಯಾ ಮತ್ತು ಮಧ್ಯಪ್ರಾಚ್ಯದ ಕೆಲವು ಭಾಗಗಳನ್ನು ತೀವ್ರ ಶಾಖದ ಒತ್ತಡದಿಂದ ವಾಸಯೋಗ್ಯವಿಲ್ಲದಂತೆ ಮಾಡಬಹುದು.

ತೀವ್ರ ಹವಾಮಾನ ಘಟನೆಗಳು

ಜಾಗತಿಕ ತಾಪಮಾನದ ಏರಿಕೆಯಿಂದ ಶಾಖದ ಅಲೆಗಳು 5 ರಿಂದ 10 ಅಧಿಕ ಪಟ್ಟು ಸಂಭವನೀಯವಾಗಿವೆ, 2024 ರಲ್ಲಿ ಭಾರತ, ಯುರೋಪ್ ಮತ್ತು ಯುನೈಟೆಡ್ ಸ್ಟೇಟ್ಸ್ ನಲ್ಲಿ ಮಾರಕ ಪರಿಣಾಮಗಳು ಉಂಟಾಗಿವೆ.  ಚಂಡಮಾರುತಗಳು ತೀವ್ರಗೊಳ್ಳುತ್ತಿವೆ; 2024 ರ ಹರಿಕೇನ್ ಮಿಲ್ಟನ್ 20 ಬಿಲಿಯನ್ ಡಾಲರ್ ಪ್ರಮಾಣದ ಆಸ್ತಿಪಾಸ್ತಿ ಹಾನಿ ಉಂಟು ಮಾಡಿದೆ.  ಭಾರೀ ಮಳೆಯಿಂದ ದಿಢೀರ್  ಪ್ರವಾಹಗಳು ಉಂಟಾಗುತ್ತಿವೆ. ಉದಾಹರಣೆಗೆ ಹೇಳುವುದಾದರೆ  2024ರಲ್ಲಿ ಉಂಟಾದ ಪಾಕಿಸ್ತಾನ ಪ್ರವಾಹ  ಲಕ್ಷಾಂತರ ಜನರನ್ನು ಸ್ಥಳಾಂತರಗೊಳಿಸಿದೆ.

ಸಮುದ್ರ ಮಟ್ಟ ಏರಿಕೆ

1993 ರಿಂದ ಜಾಗತಿಕ ಸಮುದ್ರ ಮಟ್ಟವು ವಾರ್ಷಿಕವಾಗಿ 3.7 ಮಿಮೀ ಏರಿದೆ, 2024 ರ ವೇಳೆಗೆ ಒಟ್ಟು 10 ಸೆಂಮೀ, ಕರಗುವ ಮಂಜುಗಡ್ಡೆ ಮತ್ತು ಉಷ್ಣ ವಿಸ್ತರಣೆಯಿಂದ ಇದರ ಪ್ರಮಾಣ ಮತ್ತಷ್ಟೂ ಏರಿಕೆಯಾಗಬಹುದು. ಮಿಯಾಮಿ ಮತ್ತು ಜಕಾರ್ತಾದಂತಹ ಕರಾವಳಿ ನಗರಗಳು ನಿಯಮಿತ ಪ್ರವಾಹವನ್ನು ಎದುರಿಸುತ್ತಿವೆ.  2100 ರ ವೇಳೆಗೆ 250 ಮಿಲಿಯನ್ ಜನರು ಸ್ಥಳಾಂತರಗೊಳ್ಳಬಹುದು.

ಪರಿಸರ ವ್ಯವಸ್ಥೆಯ ಅಡಚಣೆ

ಜಾಗತಿಕ ತಾಪಮಾನವು ಜೀವ ಪ್ರಬೇಧದ  ವ್ಯಾಪ್ತಿಯನ್ನು ಬದಲಾಯಿಸುತ್ತಿದೆ, ಆಹಾರ ಸರಪಳಿಗಳಿಗೆ  ಅಡಚಣೆ ಉಂಟು ಮಾಡುತ್ತದೆ. ಉದಾಹರಣೆಗೆ ಹೇಳುವುದಾದರೆ ಆರ್ಕ್ಟಿಕ್ ಸಮುದ್ರದ ಮಂಜುಗಡ್ಡೆಯ ನಷ್ಟವು ಹಿಮಕರಡಿಗಳಿಗೆ ತೀವ್ರ ಆತಂಕಕಾರಿಯಾಗಿದೆ. 1980 ರಿಂದ ಅವುಗಳ  ಆವಾಸಸ್ಥಾನ ಶೇಕಡ 30ರಷ್ಟು  ಕಡಿಮೆಯಾಗಿದೆ.

ಆಹಾರ ಮತ್ತು ನೀರಿನ ಭದ್ರತೆ

ತಾಪಮಾನ ಏರಿಕೆ  ಮತ್ತು ಬರದಿಂದ 2050 ರ ವೇಳೆಗೆ ಬೆಳೆ ಇಳುವರಿ (ಗೋಧಿ, ಮೆಕ್ಕೆಜೋಳ ) ಶೇಕಡ 10 ರಿಂದ 25 ರಷ್ಟು ಕಡಿಮೆಯಾಗಬಹುದು, ಆಫ್ರಿಕಾ ಮತ್ತು ದಕ್ಷಿಣ ಏಷಿಯಾದಲ್ಲಿ ಹಸಿವನ್ನು ಉಲ್ಬಣಗೊಳಿಸುತ್ತದೆ. ಪ್ರಮುಖವಾಗಿ ಸಿಹಿನೀರಿನ ಲಭ್ಯತೆ ಕಡಿಮೆಯಾಗುತ್ತಿದೆ.  2 ಬಿಲಿಯನ್ ಜನರು ನೀರಿನ ಕೊರತೆ  ಎದುರಿಸುತ್ತಿದ್ದಾರೆ.  ಹಿಮಾಲಯದ ಹಿಮನದಿಗಳ ಶೇಕಡ 20 ರಷ್ಟು ನಷ್ಟದಿಂದ ಸಮಸ್ಯೆ ಹೆಚ್ಚುತ್ತಿದೆ.

ಜೀವಿಗಳ ಆರೋಗ್ಯದ ಮೇಲಿನ ಪರಿಣಾಮಗಳು

2000ನೇ ಇಸ್ವಿಯಿಂದ  ರಿಂದ ಶಾಖ-ಸಂಬಂಧಿತ ಮರಣಗಳು ಶೇಕಡ  50 ರಷ್ಟು ಏರಿಕೆಯಾಗಿವೆ, ವಾರ್ಷಿಕವಾಗಿ 5 ಮಿಲಿಯನ್ ಮರಣಗಳು ಹವಾಮಾನ-ಚಾಲಿತ ಅಂಶಗಳಿಂದ ಉಂಟಾಗುತ್ತಿವೆ.  ಉದಾಹರಣೆಗೆ ಹೇಳುವುದಾದರೆ ವಾಯು ಮಾಲಿನ್ಯ, ರೋಗಾಣು ಹರಡುವ ರೋಗಗಳಿಗೆ  ಸಂಬಂಧಿಸಿವೆ. ಮಲೇರಿಯಾ ಮತ್ತು ಡೆಂಗ್ಯೂ ರೋಗಗಳು ಹೊಸ ಹೊಸ ಪ್ರದೇಶಗಳಿಗೆ ಹರಡುತ್ತಿವೆ.

ಜಾಗತಿಕ ತಾಪಮಾನ ಸಂಬಂಧಿ ಸಮಸ್ಯೆಗಳು ಮತ್ತು ಆರ್ಥಿಕ ವೆಚ್ಚ

ಹವಾಮಾನದಲ್ಲಿ ಉಂಟಾಗುತ್ತಿರುವ ನಕಾರಾತ್ಮಕ ಪರಿಣಾಮಗಳು 2024 ರಲ್ಲಿ ಜಾಗತಿಕ ಆರ್ಥಿಕತೆಗೆ 1.3 ಟ್ರಿಲಿಯನ್ ಡಾಲರ್  ವೆಚ್ಚ ಆಗುವಂತೆ ಮಾಡಿವೆ. ಅಭಿವೃದ್ಧಿಶೀಲ ರಾಷ್ಟ್ರಗಳು ಜಿಡಿಪಿಯ ( GDP) ಶೇಕಡ 10–20ರಷ್ಟು  ಕಳೆದುಕೊಳ್ಳುತ್ತಿವೆ. 2050 ರ ವೇಳೆಗೆ ಹೊಂದಾಣಿಕೆ ವೆಚ್ಚವು ವಾರ್ಷಿಕವಾಗಿ 500 ಬಿಲಿಯನ್ ಡಾಲರ್  ತಲುಪಬಹುದು. ಇದು ಅಯವ್ಯಯಗಳ ಮೇಲೆ ದುಷ್ಪರಿಣಾಮ ಉಂಟು ಮಾಡುತ್ತದೆ.

ಭೂಮಿಗೆ ಸಂಬಂಧಿಸಿ ಸಕಾರಾತ್ಮಕ ಅಂಶಗಳು

ನವೀಕರಿಸಬಹುದಾದ ಶಕ್ತಿಯ ಬೆಳವಣಿಗೆ

2024ರ ವೇಳೆಗೆ  ಜಾಗತಿಕ ನವೀಕರಿಸಬಹುದಾದ ಶಕ್ತಿಯ ಸಾಮರ್ಥ್ಯ (ಸೌರ, ಗಾಳಿ, ಜಲವಿದ್ಯುತ್) ಸುಮಾರು 3,700 ಗಿಗಾವ್ಯಾಟ್‌ಗೆ ತಲುಪಿದೆ, ಸೌರ ಮತ್ತು ಗಾಳಿ ಶಕ್ತಿಯು ವಾರ್ಷಿಕವಾಗಿ ಶೇಕಡ  24ರಷ್ಟು  ಬೆಳವಣಿಗೆ ಹೊಂದುತ್ತಿದೆ. ಇದು ಪಳೆಯುಳಿಕೆ  ಇಂಧನಗಳ  ಅವಲಂಬನೆಯನ್ನು ಕಡಿಮೆ ಮಾಡಿ CO₂ ಹೊರಸೂಸುವಿಕೆಯನ್ನು ತಗ್ಗಿಸುತ್ತದೆ. ಡೆನ್ಮಾರ್ಕ್ ಮತ್ತು ಉರುಗ್ವೆಯಂತಹ ದೇಶಗಳು ಶೇಕಡ  50 ಕ್ಕಿಂತ ಹೆಚ್ಚು ವಿದ್ಯುತ್ ಅನ್ನು ನವೀಕರಿಸಬಹುದಾದ ಶಕ್ತಿಯಿಂದ ಉತ್ಪಾದಿಸುತ್ತವೆ.

ಮರು ಅರಣ್ಯೀಕರಣ  ಮತ್ತು ಸಂರಕ್ಷಣೆ

ಬಾನ್ ಚಾಲೆಂಜ್‌ನಂತಹ ಯೋಜನೆಗಳು 2024ರ ವೇಳೆಗೆ 200 ಮಿಲಿಯನ್ ಹೆಕ್ಟೇರ್ ಬಂಜರು ಭೂಮಿಯಲ್ಲಿ ಹಸಿರುಕ್ಕುವಂತೆ ಮಾಡಿವೆ.  ಇಂಥ ಸಂರಕ್ಷಿತ ಪ್ರದೇಶಗಳು ಭೂಮಿಯ ಶೇಕಡ 17 ಮತ್ತು ಸಮುದ್ರದ ಶೇಕಡ  8%  ಒಳಗೊಂಡಿವೆ. ಇವು  ಜೈವಿಕ ವೈವಿಧ್ಯತೆಯನ್ನು ಕಾಪಾಡುತ್ತವೆ.

ಪರಿಸರಕ್ಕೆ ಸಂಬಂಧಿಸಿದ ತಾಂತ್ರಿಕ ಪ್ರಗತಿ

ಕಾರ್ಬನ್ ಕ್ಯಾಪ್ಚರ್ ಮತ್ತು ಸಂಗ್ರಹ (CCS) ತಂತ್ರಜ್ಞಾನಗಳು ವಿಸ್ತರಿಸುತ್ತಿವೆ, 40+ ವಾಣಿಜ್ಯ ಸೌಲಭ್ಯಗಳು ವಾರ್ಷಿಕವಾಗಿ 45 ಮಿಲಿಯನ್ ಟನ್ CO₂ ಸಂಗ್ರಹಿಸುತ್ತಿವೆ. ಮುಖ್ಯವಾಗಿ ಎಲೆಕ್ಟ್ರಿಕ್ ವಾಹನ (EV) ಗಳ ಮಾರುಕಟ್ಟೆ ಪ್ರವೇಶವು  2024ರಲ್ಲಿ 14 ಮಿಲಿಯನ್ ಮಾರಾಟವನ್ನು ಮೀರಿದೆ, ಇಂಥ ಪರಿಸರಸ್ನೇಹಿ ಸಾರಿಗೆಯಿಂದ  ಮಾಲಿನ್ಯದ  ಪ್ರಮಾಣ ಕಡಿಮೆಯಾಗುತ್ತದೆ.

ಪರಿಸರಕ್ಕೆ ಸಂಬಂಧಿಸಿದ ನೀತಿ ಪ್ರಗತಿ

140 ಕ್ಕೂ ಹೆಚ್ಚು ದೇಶಗಳು ಮಾಲಿನ್ಯಕ್ಕೆ ಸಂಬಂಧಿಸಿದಂತೆ  ಶೂನ್ಯ ಹೊರಸೂಸುವಿಕೆಯ ಗುರಿಗಳನ್ನು ಹೊಂದಿವೆ. ಈ ವಿಷಯದಲ್ಲಿ  ಯುರೋಪ್  2050ಕ್ಕೆ ಮತ್ತು ಚೀನಾ 2060ಕ್ಕೆ ಬದ್ಧವಾಗಿದೆ.  ಪ್ಯಾರಿಸ್ ಒಪ್ಪಂದದ ಅಡಿಯಲ್ಲಿ 2023 ರ ಜಾಗತಿಕ ಸ್ಟಾಕ್‌ಟೇಕ್ ಹವಾಮಾನ ಕ್ರಿಯೆಯನ್ನು ತ್ವರಿತಗೊಳಿಸಲಾಗಿದೆ.

ಸಮಸ್ಯೆಗಳಿಗೂ ಪರಿಹಾರವಿದೆ. ಜಾಗತಿಕ ತಾಪಮಾನ ಕಡಿಮೆ ಮಾಡುವುದು, ಅರಣ್ಯದ ನಾಶ ಮಾಡದೇ ಇರುವುದು, ನೈಸರ್ಗಿಕ ಮೂಲದ ಶಕ್ತಿ ಸಂಪನ್ಮೂಲಗಳ ಮೇಲೆ ಅವಲಂಬನೆ ಹೆಚ್ಚಿಸುವುದು,  ಅರಣ್ಯೀಕರಣದ ವೇಗ ಹೆಚ್ಚಿಸುವುದು, ಎಲೆಕ್ಟ್ರಿಕ್ ವಾಹನಗಳ ಬಳಕೆ ಹೆಚ್ಚಿಸುವುದು, ಅಂತರ್ಜಲದ ಮೇಲಿನ ಅವಲಂಬನೆಯನ್ನು ಗಣನೀಯವಾಗಿ ತಗ್ಗಿಸುವುದು, ಸಾಧ್ಯವಿರುವಷ್ಟು ಮಟ್ಟಿಗೆ ಮಾಲಿನ್ಯ ತಗ್ಗಿಸುವುದು ಇತ್ಯಾದಿ ಅಂಶಗಳಿಗೆ ತುರ್ತು ಗಮನ ನೀಡಬೇಕಿದೆ. ಇಲ್ಲದಿದ್ದರೆ ಜೀವಕುಲಕ್ಕೆ ಅಪಾಯ ಕಟ್ಟಿಟ್ಟ ಬುತ್ತಿ